Alam mo ba ang ibig sabihin ng salita o wikang BALBAL? marahil alam mo kung ano ito. Subalit sa paglipas ng ating panahon ito ay lalong lumalaganap at dapat nating bigyang pansin kung ano ba ang kahulugan ng salitang ito. Marahil alam natin na ang ating wikang Filipino ay maraming antas. Ayon sa pag-aaral ang ating wika ay may mga antas ilan sa mga halimbawa nito ay ang wikang pampanitikan, lalawiganin, kolokyal at ang wikang Balbal. Isa ang wikang Balbal na dapat nating unawain at alamin kung ano ba ang kahulugan nito. Ang wikang ito ay ating ginagamit sa kasalukuyan lalo na ng mga henerasyon ng mga kabataan ngayon. Ito ay ang mga salitang ating ginagamit na akala natin ay ayos lang at maganda para sa atin ngunit ito ay hindi kaaya-aya sa pandinig ng iba. Tinutukoy nito ang mga pangkaraniwan na salita na pinapalitan ng ibang katawagan, halimbawa: ang salitang “kabataan” ito ngayon ay maraming katawagan ngayon, noong panahon ng ’80’s ito ay tinawag na ‘Jeproks’ na sabi nila ay nangangahulugang ‘laki sa layaw. Nagdaan pa ang ilang taon ito ay tinawag namang ‘bagets’. Ilan pang halimbawa nito ay ang mga sumusunod na salita: ermat- ina, erpat- ama, pare- tsong, haybol- bahay, gimik- pasyal at marami pang iba.  Marami ang nagsasabi na ang pag babago ng mga wika o pag papaunlad nito ay isang paraan upang maipakita ang kaunladan ng isang bansa, ito ay isang tamang pagtingin at basehan ng kaunladan ng isang wika ng bansa subalit sa sobrang pagpapalawak ay hindi natin napapansin na ang mga salita na ating sinasabi ay siya ring ginagamit ng kaaway(diyablo) upang tayo ay mabulag sa prinsipyo ng Salita ng Diyos. Katulad ng mga salita na sa kasalukuyan ay ginagamit ng mga kabataan na ang mga kahulugan ay umiikot lamang sa krimen, pita ng laman at sa mga bagay na hindi dapat pag usapan. Na minsan ay madalas nating ginagamit ngunit hindi natin alam kung ano ba ang ibig sabihin nito, sabi nga nila ‘makisabay nalang tayo sa uso’ ngunit lagi nating tandaan na hindi lahat ng uso ay nakabubuti, minsan ito ay nakakasira ng ating moral at ng ating buhay. Ang pinaka usong salita ngayon ay mga salitang umiikot sa kahulugan ng mga immoral na bagay.

Ayon sa Colosas 4:6(Colossians 4:6 KJV)

“Ang inyong pananalita nawa’y laging may biyaya, na maglasang asin…” ito ay nangangahulugan lamang na nais ng Diyos na sa ating mga pananalita ay maipakita natin ang ating patotoo at ilaw bilang isang Kristiyano at Kanyang mga anak. Dahil ako’y naniniwala na kung ano ang madalas mong sabihin at ang uri ng iyong pananalita ay nagpapakita lamang ng uri ng ating pamumuhay bilang isang tao at ng ating tinitirahan. Mahalaga ang uri ng pananalita sa ating buhay, dahil kung ano ang bumubukal sa iyong puso ay siya ring lumalabas o bumubukal sa iyong bibig. Ito ang isang katanungan sa bawat isa, “Anong uri ng pananalita ang iyong ginagamit?” dapat nating tiyakin kung ang mga salita na ating ginagamit sa bawat usapan sa iba ay nakakalugod sa Panginoon.

Minsan hindi natin namamalayan na sa ating pagsasalita tayo ay nakikilala ng mga taong ating nakakausap. Ang salitang Balbal ay isang uri ng antas ng ating pananalita na ibig sabihin ay mga salita ng “Taong walang pinag-aralan, o salitang kalye” bilang isang Kristiyano huwag tayong makisabay sa agos ng mga pananalita sa mundong ito. Kung ikaw ay tunay na anak ng Diyos ang mga pananalita na iyong sasabihin ay mga salitang patungkol sa Kaniya at magbibigay kapurihan sa Kanyang pangalan. Ano- anong mga usapan ang nabubuo sa iyong pakikipag usap dahilan ng iyong mga sinsabi? at ilan sa mga salitang ito ang naluluwalhati at nahahayag sayo ang Panginoon? Ilang beses sa mga salitang ito naibabahagi mo ang kaligtasan na ayon sa Biblia?

(Maraming salamat sa pagbasa at pagbibigay ng oras sa sa artikulong ito. Nawa ito’y nakatulong at nakapag paalala sa bawat isa. Maari lamang po na mag iwan kayo ng inyong komento, ito ay isang malaking kagalakan sa akin.)

Maraming mga Kristiyano ang tinawag ng Diyos upang maglingkod sa Kaniya ngunit kaunti lamang ang pinili. Alam natin na mahirap ang buhay Kristiyano, ika nga nila “BUHAY KRISTIYANO, BUHAY PAKIKIBAKA”. Ako’y naniniwala na mahirap ang makibaka ngunit kailangan natin ang makitungo sa bawat bagay na nais ng Diyos na ating harapin. Ang panawagan ay isang malalim na salita sa ating buhay Kristiyano, ito ay ang pagtawag sa atin ng Panginoon upang paglingkuran Siya. Naniniwala ako na ang bawat isa sa atin ay tinawag upang maglingkod ngunit dumadating parin ang panahon na ang bawat isa ay makakaranas ng mga problema, kahirapan  at pagsubok. Ang mga bagay na ito ay sadyang dumadating sa ating buhay upang mas lalo tayong hubugin sa ating panawagan. At sa pamamagitan ng mga bagay na ito nasusubukan ang panawagan ng bawat isa. Nais kong ibahagi sa inyo ang aking karanasan sa aking panawagan mula sa Diyos. Noong ako ay nasa 11 taong gulang ay hindi ko pa alam ang sinasabi nilang panawagan. Maraming panahon ang aking ginugol sa mga bagay sa mundong ito na wala namang kabuluhan. At dahil ako ay wala pa sa kalooban ng Diyos ako ay walang pakialam sa mga bagay patungkol sa Diyos ngunit sa mga bagay na patungkol sa sanlibutan. Ngunit salamat sa Panginoon at ako ay nakakilala sa Kaniya dahil sa Kanyang biyaya noong ika-24 ng Agosto 2007 sa pamamagitan ng pag gamit Niya sa isang tao na siyang nagbahagi sa akin ng Kaligtasan at ako’y nakatiyak ng langit. Marami pang panahon ang nagdaan at lumipas habang ako ay binabago Niya ayon sa sa mga turo ng Kaniyang Salita. Magmula noon ay nanatiling buhay sa akin ang pag-ibig ng Diyos sa bawat isa datapwa’t tayong lahat ay makasalanan, at habang tumatagal ako sa aking pakikibaka sa buhay Kristiyano ay unti- unti akong nakakaramdam ng kakaibang pakiramdam na alam ko na ito ay mula sa Diyos. Noong una ay hindi ko matanto kung ano ang mga pangyayaring ito, sapagkat maraming mga bagay akong kinalimutan na mula sa aking mga napaka walang kabuluhang nakaraan. Taong 2008 buwan ng Mayo pagkatapos ng isang SUMMER REVIVAL CAMP na idinaos sa Lemery Batangas ay aking natiyak ko na ako pala ay tinatawag ng Panginoon upang paglingkuran Siya. Dumating ang ilang araw dumating sa aming tahanan ang isang lingkod ng Diyos na siya din ang nagmulat sa aming magkakapatid pati na rin sa mga kabataan sa aming lugar tungkol sa Salita ng Diyos. Noong araw na iyon ay ipinagpaalam nila ako sa aming magulang upang maglingkod sa Panginoon sa loob ng Carpenter’s House Baptist Church sa pamumuno ni Pastor Adiel De Torres. Noong una na ako ay dumating sa CHBC ay parang nagdadalawang isip pa ako ngunit ilang buwan ang lumipas marami akong natutunan patungkol sa Diyos. Doon ay lagi akong lumuluha sapagkat noong una ay ayaw ko talagang maglingkod sa Diyos, hindi ko alam sa sarili ko kung bakit ako nananatili. Dumaan pa ang ilang buwan at hanggang ako ay mag iisang taon na sa pagtitiis sa mga nararamdaman ko, kasabay ay nito ay unti-unti ko namang nalalaman na ako pala ay may panawagan at isa sa mga tinawag ng Diyos dahil sa Kanyang biyaya. Sa biyaya Niya ay tumugon ako sapagkat nalaman ko na ako ay tinawag Niya at ang mga bagay na aking nararanasan ay isang bahagi upang ihanda Niya ako sa aking panawagan. Natiyak ko sa aking puso na ako’y tinawag upang maglingkod sa Kaniya, marami kaming mga kabataan ang nagsuko ng buhay sa Panginoon. At doon ay mas nakaranas ako ng mga kahirapan sa aking buhay Kristiyano at lagi kong naririnig sa mga taong naghihikayat sa akin na magpatuloy sa paglilingkod sa Diyos na aking tuparin at sagutin ang pagtawag sa akin ng Panginoon.

Bilang isang Kristiyano kailangan nating malaman na tayong lahat ay may kanya-kanyang panawagan mula sa Panginoon. Ang kailangan nating gawin ay sagutin ang pag tawag sa atin ng Panginoon. Sa panawagan ay lagi nating tandaan na ang panawagan sa buhay Kristiyano ay hindi madali subalit nais ng Diyos na tayo ay tumugon sa Kaniyang panawagan. Dahil Siya ay tumatawag ngunit iilan lamang ang pinipili. Bago matapos ang isang artikulong ito, may isang katanungan akong iiwan sainyo,… Alam mo ba ang panawagan sayo ng Diyos at handa kabang sagutin ang pinaka mataas na panawagan sa ating buhay? Baka ikaw ay tinatawag na ng Diyos upang paglingkuran Siya, huwag kanang mag dalawang isip pa, SAGUTIN AT TUPARIN MO ang iyong PANAWAGAN… Philippians 3:14

(Maraming Salamat sa inyong pagbasa sa artikulong ito, nawa’y ito ay nagbigay hamon sa bawa’t isa, at patuloy lang sa biyaya ng Panginoon!)